May 9th, 2009 by BassaM
Once upon a time there was a man, he used to drink medium sugared coffee before he starts his day. Later on, he decided to change this habit, so he decided to replace it with a juice. By the time passing, the morning juice seemed to be an improper replacement. Drinking the hot coffee gives a special feeling, when you take the first sip and swallow it, you feel the warmth passing throw your cold pharynx. So, the man decided to go to another replacement, which was the hot chocolate and it works well 
. happily ever after
الشخص في القصه الي راحت هو انا
والقصد من الفكره هو اني راح اتكلم عن نقطة تغيير العادات وهو الشي الي اعتبره انا من اكبر المشاكل الي نواجهه
يا كثر ما سمعت المقوله الي تقول .. ابو طبيع ما يجوز عن طبعه
عاد انا ما اعتبر نفسي ضدها بشكل كامل ,, لكن اشوف جزء كبير منها غلط
بالنسبة لي,, مع مرور الوقت طباااااع كثيره فيني تغيرت
حتى انه مثال القهوة هو عباره عن تغيير عادة ما كنت حريص مره اني اغيرها بس كنت ابي اشوف هل انا اقدر او لا
والبيبسي الحين بالطريق لول
نجي الحين للزبده
هل صحيح ان الواحد ما يغير طبعه؟
انا اشوف ان المسائل الصعبه لو نآخذها دايم بالتدريج راح تكون سهله
نرجع مره ثانيه لمثال القهوة
كان غلط اني اعوض القهوة بالعصير .. فيه اختلاف كبير بينهم .. يعني ما كان فيه تدريج بالموضوع
بس بعد ما غيرت القهوة لمشروب قريب .. حسيت ان الموضوع اسهل ,, وتقبلته
الطبااع والعادات تختلف من شخص لشخص ,, ومن الشخص بينه وبين نفسه
فأنا لا زلت مقتنع ان الشخص ممكن يعدل من طباعه ويحسنها و يغير عاداته السيئة
بالتدريييج والاقتناااع الداخلي
عاد انا استغرب من العادات شلووون تطلع
هل شي نحب نسويه ومع كثرة اننا نسويه يتحول لعادة ؟
انا اشوف انه لا ,, لان مرات الواحد يكون عنده عاده غريبه مالها اي فايده
مثلا… في درج البيت الدرجه الثالثه دايم انطها .. كذا تعودت بدون سبب
ويا كثر ما اشوف ناس يآكلون اظافرهم
والتدخين انا اشوفه يدخل تحت العااااداااات اكثر من انه ادماان الله يكفينا ويكفيكم شره
واختم شخابيط آخر الليل
Bad Habits Are Like A Comfortable Bed, Easy To Get Into, But Hard To Get Out Of
And it is the time to get into my Lovely Bed
:اضافة
لو تخيلنا ان مدخن حصل له فقدان كامل للذاكره ..و محد رجع دله على الدخان مره ثانيه .. هل بيرجع للتدخين ؟
Posted in From here & there | Comments (5)
Leave a Reply
You must be logged in to post a comment.
May 9th, 2009 at 2:47 pm
مرحبن بوم
واللهي يا بسام أحييك على البلوق الدميل ..
كما أحيي الدرجة الثالثه اللي في درج بيتكم .. وأعزيها بما انها دايم مسحوب عليها ..
نجي للجد عاد ..
عندي عادة اني اقحن قهوة بكميات هائلة في اليوم الواحد
ولاحظت انها تزيد بالشتاء وتقل بالصيف .. بس ستل لازم اشربها
وحاولت اخفف منها .. وفيه نتائج الحمدلله بس للحين ماتخلصت منها نهائيا..
من رأيي اذا العادات هذي .. غير مضرة بالشخص .. فـ ليش اغيرها اصلا
خلني اوسع صدري
بس اذا هي ضارة بحاول قد ما اقدر اتخلص منها
يا تغلبني او اغلبها
وفي النهاية هي كلها تعتمد على رغبة التغيير .. والارادة القوية
thank you Bassam & keep it up <3
May 9th, 2009 at 3:48 pm
كلامك حلو .. ورائع ..
وانا اشوف انه معك حق باغلب الي تقوله .. يعني من جد كثير من عاداتنا تركناها ..
لكن .. انا اشوف انه يختلف من انسان لاخر .. بمعنى ..
انت من السهل عليك انك تترك عاده انت متعود عليها .. واستبدالها ببديل اخر ..
لكن غيرك لا .. يصعب عليه ..
وايضا اشوف انه يعتمد على نوع العاده .. يعني مثلا القهوه
انت تعتبرها شي سهل التغيير ..
لكن لو قلت لك غير عادت النوم عندك …
تحصلك تستصعبها بقوه .. مع ان اغلب النوم عاده ..
اشوف كذا انا ..
تحيتي ..
May 10th, 2009 at 2:15 am
Amjaad
اششششكر لك مرورك الحلو
كلامك صحيح وزي ما قلتي اذا العاده موب مضره ليش نغيرها
واشدد على نقطة ان كلها تعتمد على رغبة التغيير .. والارادة القوية
Zaid
الله يعطيك العافيه على المداخله الجميله صحيح كلامك على نوع العاده
بس لو تلاحظ النوع مرتبط بالرغبه
زي ما قلت انت مثلا النوم بالنسبه لي عاده صعب اغيرها لان الى الآن ما جتني الرغبه
لوول مستانس على النوم المبكر والجنية حقت سيندريلا
مع ان الايام هذي صاير اسهر والله
اشكرك
May 11th, 2009 at 3:52 pm
اول شي الف مبروك البلوق وكويس علمتين معنى بلوق عشان لا صاروا العالم يقولون بلوق اعرف قصدهم ..
و كالعاده شغلك دايم مرتب و شغل حلو .. و تعجبني البساطه في اسلوبك
نجي لـ هالبلوقه <<< اقدر استعملها كذا والا لا
اممممم
بسام بسام بسام ..
شوف يا حبيبي .. انا اقول لك رايي و ياخوفي محد يفهمني بلاي احيانا لا بديت اخربط اجيب العيد
انك تغير عاده فييك سيئه او ايجابيه هذا شي ممكن و يكذب على نفسه اللي يقول غير الكلام هذا..
طبعا اذا افترضنا انه ما فيك مشكله ” خُلقيه ” او ” صحيه ” تجبرك عليها..
لكن السؤال .. هل كل شي نسمع انه سئ لازم نغيره.,!!
يعني اعطيك مثال عليك انت يا بسام..
يا كثر خرابيطك ويا حبي لك
سبحان الله دايم تعلمني اشياء جديده بالنت ..
المشكله اني استمر فيها و انت تتحمس كم يوم و تسحب ..
العاده هذي بنظري سيئه .. بنظرك انت يمكن بالعكس شي كويس من باب التغيير
اترك عنك الأشياء المتفق عليها .. مثل ” قَحن ” القهوه مثلا عاده سيئه لكن مافيه مشكله بكوب او بالكثير اثنين في اليوم..
الحين اللي يجي ويقول
لا ياخي القهوه مزاج اذا ما اشرب 5 في اليوم ما يرتاح راسي .. هذا امسك كوب القهوه و كسره فوق راسه .. لانه نصاب
ياخي قل احب القهوه وانتهينا .. خل عنك راسي و الخربطه الفاضيه
الدخان مثال ثاني .. كل من قال لك اذا ما دخنت راسي يروح فيها لازم بكت في اليوم .. قل له انقلع و عن النصب 4 زقاير بالكثير تكفيك في اليوم اذا قلنا انك مدخن و تعودت على النيكوتين ..
لكن الـ 16 زقاره الزياده في البكت هذي من باب الفله و انك تبي تدخن
المهم انا شكلي طولت ولا اعرف للبلوقات ذي .. اقدر اكتب كثير والا لازم كلمتين و اسكت والله ما ادري..
المهم مبروك يا بساموو..
ولا اجي بعد اسبوعين و القى البلوق ذا ميت
June 9th, 2009 at 11:41 am
فيصل
ياخي وش اقول ؟
لوووول ما شاء الله ردك اطول من موضوعي
انت من الناس الي تعجبني طريقة تفكيرهم على فكره
وكلامك عين الصواب
اشكر لك مرورك وكثر منه